COMUNICADO URXENTE A TODO O ESTUDANTADO, PROFESORADO
E PERSOAL NON DOCENTE DE ENSINO MÉDIO GALEGO
Todas e todos os que sumamos as nosas mans para escreber a palabra VIDA
na praia de Traba da Laxe pensamos que é necesário parar
aos que escreberon a palabra MORTE con chapapote, e agora queren
escrebe-la con sangue en Iraque. De novo, temos que construir unha cadea
de humanidade e dignidade en solidariedade co pobo do Iraque.
Neste momento, cando a guerra, a máis negra de todas as mareas,
tenta asulagar as nosas consciéncias e tinxir de sangue e morte
o povo de Iraque, en Areanegra consideramos urxente e necesário
que a comunidade educativa galega mostre a sua opinión ante esta
intervención militar.
Por iso, desde Areanegra convocamos á Comunidade Educativa Galega
(estudantado, profesorado e persoal non docente) a manifestar-se en REFERENDO
o vindeiro 12 de marzo.
Esta actividade persegue os obxectivos seguintes:
-
Identificar e analisar os procesos históricos, socioeconómicos,
políticos , culturais e relixiosos que concorren nesta guerra.
-
Formar unha opinión crítica ante as intervencións
bélicas e as consecuéncias para os povos e as relacións
internacionais.
-
Educar para a paz e a convivencia entre os povos, valores imprescindíbeis
que forman parte da programación pedagóxica, e non só
como tema transversal, que todos os centros de ensino apoiamos.
-
Pór en práctica un instrumento de consulta demócratica,
que nos permite como cidadás e cidadáns exercitar o direito
a tomar parte nas decisións políticas que nos afectan
directamente.
Porque sabemos que un outro mundo é posíbel, e que está
nas nosas mans: nas mans de todas e todos os/as que o 22 de xaneiro fomos
mar, fomos terra. NON podemos quedarmos petroleados, bombardeadas,
ignoradas, manchados, asulagadas.
Berremos e fagamo-nos escoitar a través
dun REFERENDO.
|
subir
