novas de www.vieiros.com

ACTIVIDADE EDUCATIVA DE AREANEGRA

De Compostela ao Cebreiro: hai outros camiños

[22/04/2004 12:32] Máis dun milleiro de escolares de toda Galiza percorren esta mañá o Camiño de Santiago ao revés, desde Compostela ata O Cebreiro, como parte dunha actividade educativa organizada polo colectivo de ensino Areanegra. O obxectivo da xornada é reivindicar que "hai outros camiños posibeis, outros mundos posibeis". Está previsto que todos os grupos cheguen ao Cebreiro arredor das tres da tarde. Alí terá lugar un festival no que actuarán, entre outros, Carlos Santiago, Berrobambán, Belmondo, Os Ghamberros e as caboverdianas de Burela.

Anteriores: 

CONVOCADOS POR "AREANEGRA"

Escolares de toda Galiza farán o Camiño de Santiago ao revés

[19/04/2004 19:01] Máis de 1.500 rapaces e rapazas de arredor de 20 centros de ensino de toda Galiza van percorrer o Camiño de Santiago ao revés, desde Compostela ata O Cebreiro, para reivindicar "que hai outro mundo posíbel, que hai outros camiños". A actividade educativa, organizada pola coordinadora de ensino Areanegra, terá lugar o vindeiro xoves, día 22 de abril, aínda que cada centro leva traballado nos temas propostos desde hai varios meses. Cada grupo camiñará en treitos de entre seis e sete quilómetros e, posteriormente, transladaranse en buses ata O Cebreiro para participar nun festival no que participarán, entre outros, Carlos Santiago, Berrobambán, Belmondo, Os Ghamberros e as caboverdianas de Burela.

Os obxectivos que se pretenden con esta actividade son:

- Descubrir e desenmascarar as inxustizas dunha realidade herdada, identificando os mecanismos que as desencadean e perpetúan.

- Tomar conciencia de que a sociedade e os seus muros non son inamovíbeis e de que outro mundo é posíbel, baseado este no respecto aos dereitos humanos, na convivencia pacífica e na defensa da natureza.

- Sensibilizar os alumnos e alumnas para seren partícipes e protagonistas dos cambios da súa sociedade, sendo o seu destino abrir outros camiños.

Para conseguir isto, os centros levan traballando varias semanas na identificación deses "muros a derrubar" e das actitudes e accións necesarias para facelo.

Unha actividade realizada "a contracorrente por unha mocidade crítica, viva, rebelde, que non quede axeonllada ante os abusos imperialistas, asasinatos de Estado, saqueo de pobos, contaminacións ou a perda de identidade cultural...Saiamos aos camiños e recibamos aos pobos que veñen ao noso país. Amosémoslles que queremos xa ese outro mundo!. Un mundo que non sangre de fame, un mundo que non chore metralla, un mundo que non esté de costas a súa xuventude. Derrubemos en definitiva todos os muros que queren impedirnos o paso".