|
Uns 20.000 alumnos máis
tentan sumarse á Cadea
Vieiros, 20/01/2003
O
éxito da Cadea Humana organizada por Area Negra é xa
unha realidade, a dous días do evento. Á parte da
participación duns 42.000 alumnos confirmados, quedan
excluídos da convocatoria uns 20.000 nenos que se
apuntaron fóra de prazo. Ante as numerosas consultas
recibidas, a Consellería de Educación fixo pública
unha nota nos xornais aclarando que a cadea non ten carácter
institucional, ao tempo que recoñece a autonomía dos
centros e a 'escrupulosa liberdade individual de cada
alumno como cidadán'.
Uns
20.000 alumnos de Secundaria tentaron sumarse aos 50.000
compañeiros que van unir as súas mans entre as vilas de
Laxe e Muxía o 22 de xaneiro. Sen embargo, a organización
non pode facer fronte á nova abalancha de participación
a dous días do evento, xa que a camiñata está
perfectamente planificada e non deixa lugar á improvisación.
Con respecto á nota difundida pola Consellería de
Educación nesta fin de semana, para María Díaz,
profesora da Costa da Morte e voceira da Coordenadora
Area Negra, demostra o éxito da convocatoria e que a
actividade é 'normal’ e cumpre 'todos os requisitos
legais'.
A Consellería sinala que a cadea humana non ten carácter
institucional e aclara que ‘a decisión de participar na
actividade é un dereito invidual de todos os alumnos’ e
que o 'centro educativo ten autonomía para participar'.
Por outra banda, os problemas coa contratación do
transporte parecen subsanados, segundo María Díaz.
Algunhas empresas de autobuses retiraron a última hora os
servicios acordados cos centros, así que varios
institutos do sur de Galicia víronse obrigados a
contratar autobuses portugueses.
Ademais, Area Negra aceptará o ofrecemento da Consellería
de Medio Ambiente de Aragón e da Generalitat de Cataluña,
que lles enviará unha flota.
http://www.vieiros.com/noticia.asp?Ed=1&N=26937
|
subir
