|
A
falta de buses multiplica as Cadeas de alumnos
Vieiros, 21/01/2003
Varios
centros educativos que tiñan previsto participar na
Cadea Humana da Costa da Morte víronse obrigados a
suspender a actividade debido á falta de autobuses para
trasladar os nenos. As empresas argumentan que non teñen
flota suficiente para cubrir este servicio, máis o
habitual transporte escolar. Así as cousas, os alumnos
de Pontecaldelas, da Coruña, de Pontedeume e de
Oleiros, entre outros lugares, van organizar cadeas nas
súas cidades.
O
instituto de Pontecaldelas tiña apalabrada a contratación
de cinco autobuses desde o 13 de xaneiro coas empresas
Autos Arcade e García Castro, segundo explica as
vicedirectora do centro, Chus Diéguez. Unhas 275 persoas,
entre alumnos e profesores, ían participar na Cadea
Humana da Costa da Morte.
Sen embargo, as dúas compañías botáronse atrás sen
moitas explicacións lóxicas. 'Cando falamos coas
empresas, dixémoslles que terían que cubrir tamén o
transporte dos alumnos que quixeran asistir a clase, e non
houbo problema', conta unha indignada Chus Diéguez.
Logo de que Autos Arcade, dependente de Mombus, retirase o
servicio, o luns 20 de xaneiro, quedaron sen os tres
autobuses de García Castro. ‘O dono díxonos que o sentía,
pero que ía haber unha supervisión moi estricta e que co
seu pan non xogaba’, di a profesora de Pontecaldelas. Un
representante de Autos Arcade aseguroulle a Vieiros que o
único motivo polo que non atendían o servicio era a
escaseza de autobuses.
'Os alumnos estaban moi enfadados e convocaron unha
asemblea no recreo', asegura Diéguez. Así as cousas, o
centro decidiu organizar unha cadea humana na súa vila o
mesmo día 22 de xaneiro. Comezará á unha da tarde, na
Alameda de Pontecaldelas.
O Zalaeta da Coruña é outros dos centros que quedou a
velas vir. O subdirector, Antonio Colmenero, afirma que tiñan
reservados seis autobuses para 400 alumnos e que, ao
final, só lles ofreceron un. 'Non hai moita vontade da
confederación de empresarios de transporte de facer esta
viaxe', sentenciou.
Deste xeito, e a iniciativa doutro instituto coruñés, o
Ánxel Casal, o alumnado herculino apoiará a Cadea de
Laxe entrelazando as súas mans entre o Milenio e o
Acuario. Uns 4.000 rapaces cubrirán un traxecto de catro
quilómetros.
Unha representante do Ánxel Casal asegura que tentaron
contratar autobuses con todas as empresas da cidade, sen
éxito. Non tiñan flota dispoñible Castromil, Antonio Vázquez,
Autos Cancela, Autos Castro, Raposo, Autos García, Porto,
Romar, Vidal, Travidi, Calpita, e Autos Tito, entre
outros.
Os centros educativos de Oleiros e Pontedeume tamén
despregarán as súas propias cadeas humanas.
http://www.vieiros.com/noticia.asp?Ed=1&N=26975
|
subir
