CADÁVERES EXQUISITOS

DESCRICIÓN

Elaboración dun mural con cores e papel sobre a marea negra do Prestige.

 

OBXECTIVOS

• Coñecer a diversidade biolóxica das nosas costas.

• Valorar as consecuencias da marea negra do Prestige sobre o medio mariño e os nosos recursos.

• Reflexionar sobre as responsabilidades que o conxunto da cidadanía e as institucións teñen na protección do medio natural e as súas riquezas.

• Reflexionar sobre a necesidade de adoptar medidas urxentes para evitar o deterioro do medio ambiente e preservar os recursos naturais.

• Exercer o dereito á libre expresión.

• Valorar a cooperación e o traballo en equipo como a mellor forma de afrontar e dar solución aos problemas e os conflictos.

MATERIAL NECESARIO

Rolo de papel de embalar de cor clara (tantos metros coma o dobre do número de equipos participantes) e xices de cores, rotuladores...

 

DESENVOLVEMENTO

• Tema do debuxo: a marea negra do Prestige

• Condicións, só unha: debe incluír representacións de, cando menos, 10 tipos de seres vivos das nosas costas (1); o resto dos elementos que conformen o mural é de libre elección e queda ao criterio d@s debuxantes

• Procedemento: do rolo de papel só estiraremos dous metros para que comece a debuxar o primeiro equipo; ao rematar este enrolaremos o mural confeccionado deixando á vista unha solapa de 30 cm. que servirá de punto de partida para o seguinte grupo que deberá, cumprindo as mesmas condicións, continuar o labor d@s compañeir@s anteriores nos seguintes dous metros de papel. Ao finalizar este segundo equipo procederemos de igual xeito e así sucesivamente ata que finalice o último grupo. Para completar a actividade estenderemos todo o mural para vermos a "obra" na súa totalidade.

Esta actividade está pensada para que participen e colaboren varios grupos pero, é obvio, non simultaneamente; aqueles que xa a realizaron ou os que están á espera poden, mentes tanto, desenvolver calquera dos outros obradoiros, só é preciso establecer con antelación os tempos máximos dos que disporán e a orde de participación.

 

 

(1) Pódeselles, se o consideramos necesario, facilitar unha lista de especies habitantes das nosas costas; propoñemos a que segue a modo de exemplo:

 

PLANCTO
ALGAS	Broco (Fucus vesiculosus) Leituga de mar (Ulva rigida)
FANERÓGAMAS	Camariña (Corema album) Herba de namorar (Armeria maritima)
ESPONXAS	Pan de gaivota (Hallichondria panicea)
CNIDARIOS	Apegón (Actiniia sp, Anemonia sulcata) Carabela portuguesa (Physalia physalis)
ANÉLIDOS	Sabelaria (Sabellaria alveolata) Cagulo (Arenicola marina)
MOLUSCOS	Berberecho (Cardium edule) Ameixa babosa (Venerupis pullastra) Mexillón (Mytilus edulis) Ostra (Ostrea edulis.) Caramuxo (Littorina sp) Polbo (Octopus vulgaris) Choco (Sepia officinalis)
CRUSTÁCEOS	Centola (Ligia oceanica) Nécora (Necora puber) Percebe (Pollicepes cornucopia) Camarón (Palaemon serratus)
EQUINODERMOS	Estrelamar (Marthasterias glacialis) Ourizo de mar (Paracentrotus lividus
PEIXES	Sardiña (Sardina pilchardus) Peixe sapo (Lophius piscatorius) Robaliza (Dicentrarchus labrax) Xarda (Scomber scombrus) Rodaballo (Scophtalmus maximus) Lorcho (Gobius paganellus)
AVES	Arao dos cons (Uria aalgae) Arao papagaio/loro (Fratercula arctica) Arao romero (Alca torda) Corvo mariño (Phalacrocorax sp) Gaivotas (Larus sp) Mascato común (Sula bassana)
MAMÍFEROS	Humanos (Homo sapiens-sapiens) Golfiño (Delpphinus delphis)